سمك في الفرن بالخضر

السلام عليكم ورحمة الله وبركاته

سمك في الفرن بالخضر بالتفاصيل المصورة

حبيباتي الأنيقات ليوم جبت ليكم  السمك في الفرن بالخضر لي كتجي بنينة و سريعة في التوجاد 

المقادير :

 الحوت لي موجود عندنا منقي و مغسول بالملح و الحامض

2 بطاطات مقطعين دوائر

 فلفلة حلوة مقطعة دوائر

2جزرات مقطعين دوائر و مصلوقين

2مطيشات محكوكين و وحدة مقطعة دوائر

و عطرية الحوت 

المعدنوس

زيت العود

ثوم بزايد

عصير الحامض 

الزيتون 

أوراق الرند

الطريقة:

كنوجدو الشرمولة ديالنا بالربيع و الثوم و الملح و الإبزار و الكمون و الفلفل الأحمر و سكينجبير والخرقوم البلدي والملون وعصير الحامض و زيت الزيتون كنخلطو كلشي و كندهنو بيه الحوت مزيان من كل الجهات 

ثم نديرو شوية من الشرمولة في اللاطة و نستفو الجزر والبطاطس و والمطيشة المحكوكة ثم نديرو فوقهم الحوت ثم الشرمولة لي باقا و نديرو فوقهم قطع الفلفل و المطيشة و ورق الرند و الزيتون و نكبو شوية زيت الزيتون من الفوق و نغطوه بالألمنيوم و ندخلوه نصف ساعة للفرن حتي يطيب ونحيده ليه لغطا باش يتحمر من الفوق .

اترككم مع الصور